పోలవరం పూర్తికి డెడ్‌లైన్ ఫిక్స్: 2027 మార్చికి జాతికి అంకితం చేస్తామన్న సీఎం చంద్రబాబు

ఆంధ్రప్రదేశ్ జీవనాడి అయిన పోలవరం బహుళార్థ సాధక ప్రాజెక్టును 2027 మార్చి నాటికి పూర్తి చేసి జాతికి అంకితం చేస్తామని ముఖ్యమంత్రి చంద్రబాబు స్పష్టం చేశారు. సోమవారం పోలవరం ప్రాజెక్టు పనులను క్షేత్రస్థాయిలో పరిశీలించిన ఆయన, అనంతరం అధికారులతో సుదీర్ఘ సమీక్ష నిర్వహించారు. ఈ సందర్భంగా ఏర్పాటు చేసిన మీడియా సమావేశంలో ప్రాజెక్టు పురోగతి, ప్రభుత్వ లక్ష్యాలను ఆయన వెల్లడించారు. 2026 ఆగస్టు 14న, స్వాతంత్ర్య దినోత్సవ వేడుకలకు ఒకరోజు ముందు, ఎడమ ప్రధాన కాలువ ద్వారా అనకాపల్లికి గోదావరి జలాలను విడుదల చేసి చారిత్రక ఘట్టానికి శ్రీకారం చుడతామని కీలక ప్రకటన చేశారు. అక్కడ తాను స్వయంగా జలహారతి ఇచ్చి గోదావరి జలాలకు స్వాగతం పలుకుతానని తెలిపారు.

గత ప్రభుత్వ నిర్లక్ష్యంపై తీవ్ర విమర్శలు
ఈ సందర్భంగా గత ప్రభుత్వంపై చంద్రబాబు తీవ్ర స్థాయిలో విమర్శలు గుప్పించారు. 2019 నాటికి 72 శాతం పనులు తాము పూర్తి చేస్తే, ఆ తర్వాత ఐదేళ్లలో కేవలం 2 శాతం పనులు మాత్రమే జరిగాయని ఆరోపించారు. ప్రాజెక్టుపై కక్ష సాధింపు, ఏజెన్సీలను మార్చడం, పీపీఏ సూచనలను పెడచెవిన పెట్టడం వంటి చర్యల వల్ల ప్రాజెక్టు భవిష్యత్తు ప్రమాదంలో పడిందన్నారు. 

ముఖ్యంగా, ఎగువ కాఫర్ డ్యామ్‌లో ఖాళీలు వదిలేయడం వల్ల వచ్చిన వరదలకు రూ.440 కోట్లతో నిర్మించిన డయాఫ్రమ్ వాల్ కొట్టుకుపోయిందని, దీనిని గుర్తించడంలో గత ప్రభుత్వం విఫలమైందని మండిపడ్డారు. దీని ఫలితంగా ఇప్పుడు దానికి సమాంతరంగా మరో డయాఫ్రమ్ వాల్‌ను రూ.990 కోట్ల అదనపు వ్యయంతో యుద్ధప్రాతిపదికన నిర్మించాల్సి వచ్చిందని ఆవేదన వ్యక్తం చేశారు. 

"ఒకప్పుడు డయాఫ్రమ్ వాల్ దెబ్బతిన్నప్పుడు కొన్ని రోజులు నిద్రపట్టలేదు. రాష్ట్ర జీవనాడికి ఏమైపోతుందోనని మధనపడ్డాను. కానీ దేవుడి ఆశీస్సులు, కేంద్ర ప్రభుత్వ సహకారంతో ప్రాజెక్టు మళ్లీ గాడిలో పడింది" అని చంద్రబాబు అన్నారు.

పనుల పురోగతి, భవిష్యత్ కార్యాచరణ 
తాము అధికారంలోకి వచ్చాక పనులను వేగవంతం చేశామని, గత రెండేళ్లలో 15% పనులు పూర్తి చేసి మొత్తం పురోగతిని 89 శాతానికి చేర్చామని చంద్రబాబు వివరించారు. ఇప్పటివరకు రూ.7,100 కోట్లు ఖర్చు చేశామని, కేంద్రం నుంచి మరో రూ.3,835 కోట్లు రావాల్సి ఉందని తెలిపారు. 

స్పిల్‌వే, రేడియల్ గేట్లు, కాఫర్ డ్యామ్ పనులు పూర్తయ్యాయని, 50 లక్షల క్యూసెక్కుల వరదను తట్టుకునేలా గేట్లను ఏర్పాటు చేశామని చెప్పారు. ఈసీఆర్ఎఫ్ డ్యామ్ పనులు కూడా వేగంగా జరుగుతున్నాయని, గ్యాప్-1 48 శాతం, గ్యాప్-2 30 శాతం చొప్పున పూర్తయ్యాయని తెలిపారు. భూసేకరణ 94,152 ఎకరాలు పూర్తయిందని, అక్టోబర్ 26 నాటికి 100 శాతం పూర్తి చేస్తామని ధీమా వ్యక్తం చేశారు.

నిర్వాసితులకు అండగా ఉంటాం 
పోలవరం ప్రాజెక్టు కోసం త్యాగాలు చేసిన నిర్వాసితులకు అన్ని విధాలా అండగా నిలుస్తామని ముఖ్యమంత్రి భరోసా ఇచ్చారు. వారికి న్యాయం చేయడం తన నైతిక బాధ్యత అని పునరుద్ఘాటించారు. ఇప్పటివరకు 17,500 నిర్వాసిత కుటుంబాలను తరలించామని, మార్చి 2027 నాటికి పునరావాస ప్రక్రియను పూర్తి చేస్తామని హామీ ఇచ్చారు. నిర్వాసితుల కోసం 17,118 ఇళ్ల నిర్మాణం పూర్తయిందని, సొంతగా ఇల్లు కట్టుకునే వారికి లేదా ఇంటి స్థలం కొనుక్కునే వారికి అదనంగా రూ.2 లక్షలు అందిస్తున్నామని తెలిపారు.

రాష్ట్రవ్యాప్త సాగునీటి ప్రాజెక్టులపై దృష్టి 
పోలవరంతో పాటు రాష్ట్రంలోని ఇతర సాగునీటి ప్రాజెక్టులపైనా దృష్టి సారించామని చంద్రబాబు పేర్కొన్నారు. ఉత్తరాంధ్ర సుజల స్రవంతి ద్వారా వచ్చే ఏడాదికి విశాఖపట్నం తాగునీటి కష్టాలు తీరుస్తామని, ఆ తర్వాత వంశధారతో అనుసంధానం చేస్తామని చెప్పారు. ప్రకాశం జిల్లాకు వరప్రదాయిని అయిన వెలుగొండ ప్రాజెక్టు మొదటి టన్నెల్ పనులను పూర్తి చేసి, సెప్టెంబర్ 1న ప్రారంభిస్తామని ప్రకటించారు. గత ప్రభుత్వం ప్రాజెక్టు పూర్తికాకుండానే ప్రారంభోత్సవాలు చేసి ప్రజలను మోసం చేసిందని విమర్శించారు. 

రాష్ట్రవ్యాప్తంగా పెండింగ్‌లో ఉన్న 36 ప్రాజెక్టులను మూడేళ్లలో పూర్తి చేయడానికి నిర్దిష్ట కార్యాచరణ, ప్రారంభోత్సవ తేదీలతో ముందుకు వెళ్తున్నామని తెలిపారు. ఈ ప్రాజెక్టులన్నిటినీ పూర్తి చేసి రైతుల కళ్లలో ఆనందం చూడటమే తన లక్ష్యమని చంద్రబాబు స్పష్టం చేశారు. ప్రాజెక్టు పనుల పురోగతిని ఇకపై ప్రతినెలా ప్రజలకు వివరిస్తామని ఆయన తెలిపారు.